韓國係好多香港人最愛嘅旅遊熱點，無論係地道美食、掃平衫、超抵藥妝定係四季靚景，都令人想一去再去。以下就同大家分享一下韓國同香港嘅文化差異，以及各種有趣冷知識啦！
貪靚嘅韓國人同樣重視牙齒健康，所以佢哋食完每一餐都會刷牙，會隨身攜帶牙齒清潔用品，出街食完飯就會馬上喺公廁刷牙。
不過，韓國人嘅衛生意識就麻麻哋喇，韓國電視台發現竟然只有約4成嘅韓國人會喺如廁後洗手！
香港人慣咗著拖鞋就唔著襪，不過原來韓國人係會著拖鞋時著襪，呢個唔係一種 Fashion，而係佢哋嘅生活習慣。韓國有好多餐廳都會需要除鞋入內，由於韓國人覺得喺人哋面前露出腳趾係唔禮貌嘅事，所以習慣咗著拖鞋都著襪。
韓國人熱愛凍飲，就算係冬天都會飲凍水，所以餐廳基本都只會提供凍水，去 Cafe 都一定係飲凍咖啡，甚至幾凍都會食雪糕刨冰！
以前一個人去韓國玩，飲食選擇唔係太多，大部分餐廳都係較適合聚餐，加上韓國人覺得自己一個人食飯係一件唔太光采嘅事，所以搵一人餐廳好困難。隨著單身人口愈來愈多，開始有「一人食堂」嘅出現，去韓國旅行都可以一個人食燒肉打邊爐！
韓國係一個非常重視長幼有序嘅國家，同時亦強調年齡輩份。所以韓國人喺結識新朋友嘅時候，都會馬上詢問對方嘅年紀，再決定需唔需要使用敬語，如果有韓國朋友問你年紀，亦唔需要覺得奇怪㗎！
韓國政府規定食物同埋飲品開封之後，都唔可以帶上公車，因為太多人習慣帶食物上車，而又令到公共空間好髒亂，所以韓國改為明文規定，不過如果飲品、食物未開封，都仲係可以帶上車嘅！
韓國嘅連鎖 Cafe 係禁用外賣杯，由於政府大力減塑，堂食的話唔會提供外賣杯，而如果你叫咗外賣又坐喺 Cafe 內的話，好大機會被店員請出去，所以去 Cafe 時要記得自律喇！
喺韓國好多人都會戴口罩，就算係 Covid 之前大家都鐘意戴口罩，而且比較多會戴黑色嘅口罩。原來喺韓國戴白色口罩的話，係代表啱啱做完手術或者係整完容，大家如果會戴口罩都不妨留意一下！
